Servisio di Atmishon ta rekordá tur kliente riba e formularionan adaptá
Willemstad – Servisio di Atmishon ta rekordá su klientenan ku entrante 15 di febrüari 2024 e formularionan bieu di deklarashon no ta bálido mas. Ta trata aki di e formularionan di deklarashon di garantia, deklarashon di doño di trabou, deklarashon di studiante i tambe e asina yamá ‘Kennisgeving Definitief Vertrek’.
Deklarason di garantia, doño di trabou, studiante i tripulashon naval Na momentu ku ta entregá un petishon kual mester hasi uzo di un di e deklarashonnan menshoná, mester pega un stampia di naf. 10,= riba esakinan. Riba e formulario tin un hòki speshal pa pega e stampia. Entrante 15 di febrüari 2024 no ta tuma deklarashonnan ku ta keda modifiká. Riba e wèpsait di Servisio di Atmishon www.immigrationcur.org por download e formularionan nobo.
Baimentu definitivo Entrante 15 di febrüari 2024 e formulario bieu pa ‘Kennisgeving Definitief Vertrek’ tambe no ta bálido mas. E formulario aki ta keda uzá na momentu ku un ekstranhero ta bandoná pais definitivo. E estranhero ta traha un sita pa pasa na Servisio di Atmishon pa tuma e formulario, despues di a hasi pago di tarifa i retribushon pa e prosedura aki. Ku e formulario aki e estranhero ta tuma un stèmpel na Parkèt di Ministerio Públiko i dos stèmpel na Ofisina di Impuesto. Despues e estranhero ta akudí na Kranshi. Por último, ta regresá Servisio di Atmishon ku e formulario yená ku e stèmpelnan i tambe e komprobante di Kranshi ku a kita nòmber.
Si un ekstranhero tin e formulario bieu pa e proseso di baimentu definitivo, mester akudí na Servisio di Atmishon pa kambia esaki pa e formulario nobo.
Pa mas informashon i tambe formulario por subi wèpsait di Servisio di Atmishon www.immigrationcur.org.